ضربة جديدة على وجه اسرائيل من المخابرات العامة المصرية

الحكاية بدأت يوم 21 مارس اللي فات.. 3 شباب من بدو النقب بيحملوا الجنسية الإسرائيلية (بلال مسعودين، وبلال الأفشق، وأحمد الدوجي) نزلوا مصر تحت غطاء الفسحة في شرم الشيخ. بحر وشمس؟ لأ.. التحركات كانت رصد ومعلومات وتفاصيل حساسة لحساب تل أبيب.

المضحك إنهم كانوا فاكرين نفسهم أشباح، وميعرفوش إن الأجهزة الأمنية المصرية كانت سيباهم يتحركوا بـ “مزاجها”.. بتسيبك تتمادى وتجمع وتكتب وتورّط نفسك بإيدك، لحد ما تتقفل القضية بأدلة مفيهاش خُرم إبرة للشك.

الضربة القاضية بقى متضربتش في الفندق ولا في نص الطريق.. الضربة اتسابت لأقسى سيناريو ممكن يعيشه جاسوس ..!

العربيات خلاص وصلت معبر طابا، والسلك الحدودي باين قدام عينيهم على بُعد مترين اتنين، وخلاص بيعدوا ثواني الرجوع.. وفجأة، نزلت الستارة بهدوء يرعب:

“انزل يا بطل منك له.. الفسحة خلصت، والحساب هيبدأ حالا ..!”

اتسحبوا في صمت كامل، ومن اللحظة دي انقطع الإرسال عنهم تماماً، وكأن الأرض انشقت وبلعتهم!

بقالهم 6 شهور وإسرائيل بتغلي ومش عارفة تطلّع معلومة واحدة.. اتصالات بتجري على أعلى مستوى، النائب السابق طالب الصانع بيجري بين نتنياهو والرئيس هرتسوج ووزير الخارجية ساعر، والكل بيضغط عشان يعرف العيال فين أو تهمتهم إيه.. والرد المصري دايماً جدار فولاذي مبيتهزش: “الموضوع يمس الأمن القومي المصري، والقضية في إيد جهات التحقيق العليا”.

وحتى المحامين المصريين اللي العائلات حاولت تغريهم عشان يتدخلوا في القضية، أول ما شموا ريحة الملف وشافوا حجم الكارثة نفدوا بجلدهم وانسحبوا فوراً؛ لأن في قضايا الأمن القومي مفيش وساطة، ومفيش هزار، ومفيش رحمة.

الرسالة خرجت من معبر طابا بصوت عالي ومباشر: مصر بلد مضياف وسياحتها مفتوحة للكل.. بس لو عقلك صوّرلك إنك تيجي تلعب في ضهر البلد دي، افتكر إن المخابرات المصرية بتسيبك تخطط على مهلك، بس بتنهي الجيم في اللحظة اللي هي تختارها!تسلم الأيادي وتحيا مصر

متنساش تعمل متابعة للصفحة ومشاركة تصلك اخبارنا